محدش يقدر ينكر ان ثقافة “التوكتوك” دلوقتى بقت تمثل خطر كبير على مجتمعنا .
الخطر الحقيقى للتوكتوك مش بس انة بقى اهم ادوات الجريمة الحديثة , و مش بس لان معظم اللى بيسوقوه يا اما مجرمين يا اما اطفال نفسهم يبقوا مجرمين فى المستقبل . للاسف #التوكتوك قضى على اى امكانية لظهور عمالة ماهرة فى المستقبل . خلاص انسى تلاقى سباك شاطر ولا نجار فنان ولا حتى ميكانيكى بيفهم . لية يروح يشتغل فى ورشة و يتعلم صنعة و يصحى بدرى لما ممكن ينزل يشتغل على توكتوك يعاكس ده و يركب ده و يسمع مهرجانات و يقضيها زى ما هو عايز ؟!!!!!
الجديد بقى ان الناس اتقسمت فريقين بالنسبة لمشكلة التوكتوك . فريق شايف ان الاباده هى الحل و فريق تانى شايف ان دول ناس بتاكل عيش و ماينفعش نقطع اكل عيشهم . و للامانة الفريقين عندهم حق .
التوكتوك النهارده ثمنة مش اقل من 40.000 جنية و شكلة وحش و حتى القعده فية مش مريحة لو قارنا التوكتوك بعربية زى السوزوكى التو مثلا هانلاقى ان الحجم اذا ماكنش واحد , يبقى الماروتى اصغر و طبعا الامكانيات كلها فى صالح الماروتى , كفاية انها عربية . لكن الماروتى سعرها حوالى 110.000 جنية و ده مشكلة .
لو عايزين نحل المشكلة بجد يبقى لازم نفهم انها للاسف هاتاخد وقت ( من 3 : 5 سنين ) علشان مانضرش اللى بياكلوا عيش و فى نفس الوقت نوفر بديل مناسب للانتقالات الداخلية .و الحل ده هايتم من خلال عده خطوات :-
1 – لازم الكل يعرف ان الحكومة جاده فعلا فى حل مشكلة التوكتوك, و انها هاتاخد مجموعة اجراءات يجب الالتزام بها و ان اى مخالفة للاجراءات ده هاتكون عقوبتها مصادرة و تكهين التوكتوك. مع الاعلان عن تاريخ محدد للانهاء تماما من مشكلة التوكتوك ( و ليكن مثلا سنة 2025 ) .
2 – انشاء صندوق دعم اصحاب #التوكتوك. و هايتم تمويل الصندوق بطريقتين ؛
– التبرعات .
– 20 جنية رسوم اضافية سنوية مؤقتة لمده 3 سنوات على كل المركبات فى مصر ( مصر فيها حوالى 8.4 مليون مركبة مرخصة )* و ده هايوفر على الاقل 500 مليون جنية .
3 – لازم يتم حصر التوكتوك تمهيدا لتقنينة من خلال تصاريح مؤقتة من المحليات مش من المرور, و التصريح لازم يكون باسم صاحب التوكتوك و يجدد التصريح كل 6 شهور و طبعا ماينفعش حد تانى يسوقة غير اللى التصريح باسمة و طبعا طبعا لازم يكون سنة اكبر من 18 سنة. التصريح ده بمقابل مدى مكافئ لترخيص سيارات الاجرة , ده راجل شغال و بيكسب زية زى التاكسى و يمكن اكثر .
المرحلة ده تاخد من 3 : 6 شهور و بعدها هايتم وقف استخراج اى تصاريح جديده و اى توكتوك مش معاه تصريح يبقى مصادرة و تكهين .
4 – وضع شروط و قواعد و مناطق سير للتوكتوك , اهمها عدم السير فى الشوارع و المحاور الرئيسية , عدم استخدام الكبارى او الانفاق , الالتزام بالسير اقصى يمين الطريق , الالتزام بوضع رقم التصريح فى مكان بارز داخل و خارج التوكتوك , الالتزام بتوفير الاضائة الكافية الكاشفة داخل كابينة التوكتوك , الالتزام بالعدد الامن للركاب و غيرها من القواعد اللى تضمن سلامة الركاب . و اى مخالفة للكلام ده مصادرة و تكهين . مفيش مخالفات .
5 – اى واحد هايجدد التصريح 4 مرات متتالية, يبقى دا راجل ملتزم و بياكل عيش بجد و ساعتها هايدخل برنامج حماية اصحاب التوكتوك اللى بيتم تمويله من خلال صندوق الدعم.
6 – البرنامج ده بيطرح 4 بدائل لاصحاب التوكتوك (بعد دراسة حالتهم) يختار منهم اللى يناسبة و هم:
– دعم بنسبة 10% من ثمن تاكسى بى واى دى BYD (او ما يساويها), او 80% من اقل مقدم ايهما اقرب.
– دعم بنسبة 15% من ثمن سوزوكى فان (اللى بيسموها الثمناية), او 80% من اقل مقدم ايهما اقرب.
– دعم بنسبة 20% من ثمن تاكسى سوزوكى التو (اللى تقريبا نفس حجم التوكتوك) او 80% من اقل مقدم ايهما اقرب.
– دعم مادى لا يتجاوز 20.000 جنية مقابل تسليم التوكتوك.
اعتقد اننا بالشكل ده هانبقى ساعدنا اللى عايز ياكل عيش بجد , و اتخلصنا من التوكتوك و مشاكله و فى نفس الوقت اشتغلنا على حل ازمة المواصلات .
