اثيوبيا دولة فيدرالية بتتكون من 9 اقاليم عرقية ليها حكم ذاتى ,و حسب كلام دائرة المعارف البريطانية فاثيوبيا فيها حوالى 100 لغة ممكن نقسمها الى 4 مجموعات اساسية و هى السامية و الكوشية و الاومية و دول من اسرة الافرو-اسيوية , و المجموعة الرابعة بتنتمى الى النيلية و ده جزء من اسرة النيل اللغوية.
الاورومو
قومية الاورومو موجوده فى اقليم اوروميا الموجود فى وسط اثيوبيا و دول بيشكلوا حوالى 34% من السكان و بيتكلموا باللغه الاورومية و معظمهم بيشتغلوا بالزراعة و الرعى . و بالرغم من انهم اكبر مجموعة عرقية الا انهم كانوا طول الوقت مهمشين .
و المظاهرات اللى حصلت فى 2015 كانت بسبب نزاع بين مواطنين معظمهم من الاورومو و بين الحكومة على مليكة بعض الاراضى , لكن المظاهرات ده كبرت و تصاعدت للمطالبة بالحقوق السياسية و حقوق الانسان و يقال ان المظاهرات مات فيها المئات و اعتقل فيها الاف .
و كانت نتيجة المظاهرات ده ان الائتلاف الحاكم ساعتها اضطر يغير رئيس الوزراء هايلي مريام ديسالين بآبي أحمد، الذي بينتمي إلى عرقية الأورومو .
على فكرة المظاهرات ده اتجددت تانى فى 2020 و مات فيها العشرات بعد مقتل المطرب هاشالو هونديسا.
الاورومو ليهم التقويم الخاص بيهم المبنى على ملاحظات فلكية و نظامهم الاجتماعى اللى اسمة “غادا” اللى بيدى اهمية كبيرة لعامل السن .فا على راس الهرم هتلاقى الاكبر سنا و اللى بيعتبروهم الاكثر حكمة و اللى بيتم استشارتهم فى امور الحرب و الجوار و خلافة.
الامهرة
هما تانى مجموعة عرقية من حيث عدد السكان و بيتكلموا اللغة الامهرية و ده اللغة الرسمية فى اثيوبيا و بيشكلوا حوالى 27% من عدد السكان . و على حسب معتقدهم التقليدى فان اصولهم بترجع الى سام بن نوح.
مشهورين جدا باكلاتهم الكليانة بالبهارات و الشطة و الثوم ده غير انهم اكثر ناس بتستهلك القهوة , و بيستخدموا الامثال و الاساطير لتعليم اطفالهم القيم الاخلاقية .و عندهم نظام “ابوى” ذكورى بيميزوا فية الرجالة على الستات.
لكن اغرب حاجة فيهم ان كثير جدا منهم من سكان المتجمتعات الريفية الرعوية مابيحبوش يلبسوا جزم !
التيغراى / التيجراى
بالرغم من انهم بيمثلوا حوالى 6% من السكان الا انهم كانوا الطبقة الحاكمة فى اثيوبيا لفترة طويلة , عايشين فى شمال اثيوبيا على حدود اريتريا.
الجبهة الشعبية لتحرير تيجراى كانت اقوى اطراف الائتلاف الحاكم فى اثيوبيا لكن فى اول فترة حكم ابى احمد سنة 2018 حجم نفوذها و من ساعتها ساءت العلاقة بينهم و خصوصا بعد ما ابى احمد حل الائتلاف الحاكم ده اللى كان بيتكون من احزاب اقليمية عرقية و اعلن دمج الاحزاب ده فى حزب وطنى واحد اسمة حزب الرخاء , لكن جبهة تحرير تيجراى رفضت الانضام ليه.
و من ساعتها و قاده الاقليم بيقولوا انهم بيتعرضوا لعملية تطهير عرقى و اتهامات بالفساد و بيقولوا ان ابى احمد زعيم غير شرعى لان ولايته انتهت و انة بيتحجج بازمة كورونا لتاجيل الانتخابات.
و فى شهر سبتمبر اللى فات تحدت الجبهة الحظر المفروض على الانتخابات فى اثيوبيا و عملت انتخابات اعتبرتها الحكومة المركزية غير قانونية . و من ساعتها حصلت الاحداث الماساوية فى الاقليم .
القومية الصومالية
متمركزين فى منطقة اوجادين لكن منتشرين فى كل البلد و بالرغم من انهم بيشكلوا 6% من السكان برضة زى التيجراى الا انهم تقريبا مالهموش تاثير على الحكم هناك.
القومية الصومالية مقسومة الى عشائر و الغالبية العظمى منهم مسلمين
اعراق تانية
فى قوميات تانية زى عفار و هادييا و جامو و الولياتا و غيرهم كثير .
