ميثاق أخوية كمت

𓋹𓊽𓌀 لا شرف أعلى من شرف الانتساب لمصر 𓋹𓊽𓌀

𓋹𓊽𓌀 فلتـحيـــــا الأمــــــــــة المصـــــريــــــة 𓋹𓊽𓌀

أولًا: الهوية والغاية

إحنا مؤمنين إن مفيش شرف في الدنيا يعلو على شرف الانتماء لمصر.

غايتنا واضحة، وقضيتنا عادلة ..
عايزين نرجع لمصر مكانتها وهويتها الحقيقية، ونأكد على الهوية المصرية الكميتية الأصيلة.

إحنا ما بنحتكرش التيار القومي،
وبنرحب بكل القوميين اللي شايفين مصر أولًا وأخيرًا.

ثانيًا: الدولة والوطن

توجهنا هو قيام دولة مدنية مصرية بتحترم الإنسان أيًّا كان،
من غير تفرقة لا على أساس دين، ولا عِرق، ولا طبقة.

كل الثقافات اللي في الدلتا، الصعيد، سيناء، والواحات هي أجزاء من نسيج الوطن والثقافة المصرية الواحدة.

الدين لله، والوطن للجميع.
كلنا مصريين، سواسية في الحقوق والواجبات،
بنحترم كل الأديان والمعتقدات ومانتعرضش لأي منها.

ثالثًا: الهوية المصرية

إحنا مش عرب، ولا تابعين لأي عِرق تاني.
إحنا مصريين وبس، أصلنا ومرجعيتنا الحضارة المصرية القديمة.

ثقافتنا جاية من حضارتنا،
ولغتنا الأصلية هي اللغة المصرية القديمة (را إن كمت)،
أما لغتنا الحالية – العامية المصرية – فهي الامتداد الطبيعي لهويتنا دلوقتي.

رابعًا: التاريخ المصري

إحنا بندعم كل ما هو مصري،
في كل مراحل التاريخ، من أول الحضارة القديمة لحد النهارده،
لأن كل فترة منهم ساهمت في تشكيل هويتنا الحالية.

لكن أصل الهوية القومية المصرية هو الحضارة المصرية القديمة —
منها بدأنا، ومنها قامت أول دولة على وجه الأرض.

خامسًا: الانتماء

أي حد على أرض مصر،
وبيعتبر نفسه مصري،
فهو مصري .. بغض النظر عن أصله أو تحليله الجيني.
لأن المصرية انتماء .. مش جينات.

بس في نفس الوقت،
إحنا ضد التجنيس العشوائي وضد تجنيس اللاجئين.

سادسًا: الأخلاق والمبادئ

مبادئ ماعت هي مرجعيتنا الأخلاقية:
العدل، والحق، والنظام، والصدق، والأدب.
دول الأساس اللي بنبني عليه فكرنا وسلوكنا.

سابعًا: الهدف

هدفنا ننهض بالفكر القومي المصري،
ونرجع للمصري وعيه بنفسه،
عشان يعرف هو مين، كان إيه، ويقدر يكون إيه تاني.

ثامنًا: الرموز والشعارات

بنفتخر بعلمنا المصري،
ورمزنا هو رع حور آختي،
رمز القوة والحماية، اللي بيعبر عن روح مصر الصامدة.

تاسعًا: الإيمان بالوطن

القوميين المصريين بيحبوا مصر حب مقدس.
مصر عندنا هي الأرض الطاهرة والأم،
ومستعدين ندافع عنها ضد أي خطر داخلي أو خارجي.

حدودها عندنا مقدسة،
ونضحي بنفسنا فداها وفدا الدولة المصرية.

عاشرًا: من أقوالنا الملهمة

 شادي عبد السلام — مخرج ومصمم أزياء مصري

“منذ بدأت أعمل وأنا أعتقد أن لي قضية ..
قضيتي هي التاريخ الغائب أو المفقود ..
الناس الذين تراهم في الشوارع والبيوت، في الحقول والمصانع،
لهم تاريخ .. هؤلاء الناس أغنوا الإنسانية ..
كيف نعيدهم للدور نفسه؟ كيف نستعيد مساهمتهم الإيجابية والقوية في الحياة؟
لابد أولًا أن يعرفوا من هم، وماذا كانوا، وماذا قدموا ..
لابد أن نوصل بين إنسان اليوم وإنسان الأمس
لنقدم إنسان الغد ..
هذه هي قضيتي.”

 القوميين المصريين .. صوت الهوية المصرية الأصيلة، وضمير الأمة.

𓋹𓊽𓌀 لا شرف أعلى من شرف الانتساب لمصر 𓋹𓊽𓌀
𓋹𓊽𓌀 فلتـحيـــــا الأمــــــــــة المصـــــريــــــة 𓋹𓊽𓌀